ជនជាតិចិនបើករថយន្ត បុករថយន្តព្រុសនិងម៉ូតូកូនទាចតចិញ្ចើមផ្លូវបណ្តាលឲ្យរបួសម្នាក់ និងខូចខាតរថយន្តទាំង២គ្រឿង

បន្ទាយមានជ័យ៖ ជនជាតិចិនបើករថយន្តអាលផាតបុករថយន្តព្រុសនិងម៉ូតូកូនទាចតចោលចិញ្ចើមផ្លូវបណ្តាលឲ្យរបួសម្នាក់ និងខូចខាតរថយន្តទាំង២គ្រឿង ហេតុការណ៍នេះ កើតឡើងកាលពីយប់ម៉ោង៤ទាបភ្លឺ ថ្ងៃទី១៦ ខែមីនា ឆ្នាំ២០២៤តាមផ្លូវដើមពុទ្រាស្ថិតភូមិក្បាលស្ពានមួយ សង្កាត់អូរជ្រៅ ក្រុងប៉ោយប៉ែត។
ម្ចាស់រថយន្តព្រុសបានប្រាប់ថា៖ នៅពេលដែលគាត់ចតរថយន្តព្រុសសេរីឆ្នាំ២០១០ពាក់ផ្លាកលេខភ្នំពេញ2BW.5576 ចតមុខហាងនៅចិញ្ចើមផ្លូវនិងម៉ូតូកូនទា១គ្រឿងទៀតស្រាប់តែមានរថយន្តម៉ាកតូយូតាអាលផាតពាក់ផ្លាកលេខភ្នំពេញ2BW.5948ដែលបើកបរដោយជនជាតិចិន និងអ្នករួមដំណើរក្នុងរថយន្តរ៤ទៅ៥នាក់បានបុក បណ្តាលឲ្យរបួសម្នាក់ក្នុងរថយន្តអាលផាត និងរងការខូចខាតមួយចំហ៊ាងខាងមុខខាងស្តាំ ចំណែករថយន្តព្រុសចតនៅលើចិញ្ចើមផ្លូវ ខូចខាតមួយចំហ៊ាងមុខខាងស្តាំដូចគ្នាហើយម៉ូតូកូនទាខូចខាតធ្ងន់។
ក្រោយគ្រោះថ្នាក់ចរាចរណ៍កើតឡើង ជនជាតិចិនប្រាប់ថា៖ មូលហេតុបើករថយន្តបុករថយន្តព្រុសចតចោលចិញ្ចើមផ្លូវព្រោះគាត់បើកគេចពីផាសអាប់បើកបញ្ច្រាស់ទិសគ្នាចូលគន្លងខាងគាត់ទើបបើកគេចទៅបុករថយន្តព្រុសបណ្តាលខូចខាតទាំងសងខាងនិងរងរបួសម្នាក់អ្នករួមដំណើរជាមួយគាត់ ក្រោយបង្កហើយភាគីចិនបានសំណងទៅរថយន្តព្រុសចំនួន៣.០០០ដុល្លារ និងសងខាងម៉ូតូកូនទាអស់១២,០០០បាត បញ្ចប់រឿងនៅកន្លែងកើតហេតុតែម្តង៕ (សៅ នៅ)